Azərbaycan Respublikası Səhiyyə Nazirliyinin rəsmi saytı

Dərman vasitələri barədə qanunvericilik aktlarına dair BƏLƏDÇİ QAYDALAR

Dərman vasitələri barədə qanunvericilik aktlarına dair

BƏLƏDÇİ QAYDALAR

 

22 dekabr 2006-cı il tarixdə “Dərman vasitələri haqqında” Azərbaycan Respublikasının Qanunu imzalanmışdır.

Bu Qanun Azərbaycan Respublikasında dərman və tibb vasitələri ilə davranışın hüquqi və təşkilati əsaslarını müəyyən edir, bu sahədə yaranan münasibətləri tənzimləyir.

Qanuna uyğun olaraq Azərbaycan Respublikasında istehsal olunan və ya ölkəyə idxal edilən dərman vasitələrinin istifadəsi təlimatları Azərbaycan dilində dərman vasitəsinin ticarət və patentləşdirilməmiş adını, dərman vasitəsini istehsal edən ölkənin adını, dərman vasitəsinin istehsalçısının adını və hüquqi ünvanını, hazırlanma tarixi və seriya nömrəsini, tətbiq olunma qaydasını, dozasını, formasını, qablaşmada olan dozaların sayını, yararlılıq müddətini, saxlanma və buraxılma şərtlərini, dərman vasitəsinin tətbiqi zamanı təhlükəsizlik tədbirlərini, dərman vasitəsinin tərkibindəki komponentlər haqqında məlumatı, tətbiq sahəsini, əks-göstərişləri, əlavə təsirləri və digər dərman vasitələri ilə qarşılıqlı əlaqəsini əks etdirməlidir.

Əhaliyə dərman vasitələri yalnız aptek təşkilatları tərəfindən buraxılır. Aptek təşkilatlarında “Həyati vacib və təcili hallarda istifadə edilən dərman vasitələrinin siyahısı”na daxil edilmiş dərman vasitələrinin olması məcburidir. Optik ləvazimatlar, ətriyyat-kosmetika, uşaq yeməkləri, müalicəvi mineral sular, bioloji fəallığa malik qida əlavələri və şəxsi sanitariya-gigiyena malları istisna olmaqla, aptek təşkilatlarında digər malların satılması qadağandır. Həkim resepti təqdim edilməklə buraxılmalı olan dərman vasitələrinin reseptsiz buraxılması qadağandır.

Aptek təşkilatlarında xəstə qəbul etmək qadağandır. Yalnız həyat üçün təhlükəli olan hallarda aptek təşkilatlarına gətirilən şəxslərə ilk tibbi yardım göstərilə bilər.

Hər bir şəxs dərman vasitəsinin səmərəliliyi, onun əlavə təsirləri, müxtəlif dərman vasitələrinin birgə istifadəsi zamanı qarşılıqlı əlaqəsi, habelə təyin edilmiş dərman vasitəsindən istifadə olunması qaydası barədə ətraflı məlumat almaq hüququna malikdir.

Dərman vasitələrinin tətbiqi və dövriyyəsi ilə məşğul olan fiziki və hüquqi şəxslərin qanunazidd hərəkətləri nəticəsində insan sağlamlığına vurulmuş zərər qanunvericilikdə müəyyən olunmuş qaydada həmin şəxslər tərəfindən ödənilir. Dərman vasitələrinin tətbiqi nəticəsində insanın sağlamlığına vurulmuş zərər dərman vasitəsi təyinatı üzrə, istifadə təlimatına müvafiq surətdə tətbiq edilməsi və onun insan sağlamlığına zərərli təsiri istehsal zamanı yol verilmiş səhvlərin nəticəsində baş verməsi, dərman vasitəsinin insan sağlamlığına zərərli təsiri istehsalçı tərəfindən dərc edilmiş istifadə təlimatında yol verilmiş səhvlərin nəticəsində baş verməsi sübut olunduğu halda istehsalçı tərəfindən ödənilməlidir.

Dərman vasitəsinin insan sağlamlığına zərərli təsiri dərman vasitəsinin topdansatış əczaçılıq müəssisələrində və ya aptek təşkilatlarında saxlanma qaydalarının pozulması səbəbindən yararsız hala düşməsi nəticəsində baş verərsə, vurulmuş zərər həmin topdansatış əczaçılıq müəssisələri və ya aptek təşkilatları tərəfindən ödənilməlidir.

6 fevral 2007-ci il tarixdə “Dərman vasitələri haqqında” Azərbaycan Respublikası Qanununun tətbiq edilməsi barədə Azərbaycan Respublikası Prezidentinin Fərmanı imzalanmışdır.

Bu Fərmanla Azərbaycan Respublikasının Nazirlər Kabinetinə “Dərman vasitələri haqqında” Azərbaycan Respublikasının Qanununda nəzərdə tutulmuş dərman vasitələrinin dövlət qeydiyyatına alınması və reyestrinin aparılması qaydalarının, dərman vasitələrinin humanitar məqsədlər üçün Azərbaycan Respublikasına idxalı qaydasının, hazırlanması, keyfiyyətinin, təhlükəsizliyinin və səmərəliliyinin araşdırılması məqsədi ilə dərman vasitələrinin elmi tədqiqat müəssisələri tərəfindən Azərbaycan Respublikasına idxalı qaydası və idxalına yol verilən miqdarın müəyyən edilməsi və bu barədə Azərbaycan Respublikasının Prezidentinə məlumat verilməsi tapşırılmışdır.

Azərbaycan Respublikası Nazirlər Kabinetinin 108 nömrəli 13 iyul 2007-ci il tarixli Qərarı ilə “Dərman vasitələrinin dövlət qeydiyyatına alınması və reyestrinin aparılması Qaydaları”, 116 nömrəli 25 iyul 2007-ci il tarixli Qərarı ilə “Hazırlanması, keyfiyyətinin, təhlükəsizliyinin və səmərəliliyinin araşdırılması məqsədi ilə dərman vasitələrinin elmi tədqiqat müəssisələri tərəfindən Azərbaycan Respublikasına idxalı Qaydası”, 141 nömrəli 25 sentyabr 2007-ci il tarixli Qərarı ilə “Dərman vasitələrinin humanitar məqsədlər üçün Azərbaycan Respublikasına idxalı Qaydası” və 83 nömrəli 30 aprel 2010-cu il tarixli Qərarı ilə “Dərman vasitələrinin elmi tədqiqatlarının, klinikaya qədər tədqiqatlarının və klinik sınaqlarının aparılması Qaydaları” təsdiq edilmişdir.

Səhiyyə Nazirliyinin 114 nömrəli 3 dekabr 2010-cu il tarixli əmri ilə “Həkim resepti olmadan buraxılan dərman vasitələrinin reklamına rəy verilməsi Qaydası” və Səhiyyə Nazirliyi Kollegiyasının 19 nömrəli 7 may 2013-cü il tarixli qərarı ilə “Özəl tibb fəaliyyəti subyektləri tərəfindən göstərilən tibbi xidmətlərin və həkim resepti olmadan buraxılan dərman vasitələrinin reklamına rəy verilməsi Qaydası” təsdiq edilmişdir.

 

 

Azərbaycan Respublikası Səhiyyə Nazirliyin Rəsmi Saytı
Saytdakı materiallardan istifadə edərkən istinad etmək zəruridir!
Bütün hüquqlar qorunur! © 2011-2013