Azərbaycan Respublikası Səhiyyə Nazirliyinin rəsmi saytı

“Reproduktiv sağlamlığın qorunması” mövzusunda forum keçirilib

18-20 oktyabr 2016-cı il tarixlərdə Ukraynanın paytaxtı Kiyev şəhərində Şərqi Avropa və Mərkəzi Asiya regionunda böhran hallarında cinsi və reproduktiv sağlamlığın qorunub saxlanılması üzrə İdarələrarası işçi qrupun 5-ci forumu keçirilib.

Forum Beynəlxalq Ailə planlaşdırması Federasiyasının Avropa ofisinin, BMT-nin Əhali Fondunun (UNFPA), Şərqi Avropa və Mərkəzi Asiya Regional Fondunun təşkilatçılığı ilə baş tutub.

Tədbirin əsas məqsədi 2016-cı ildə Şərqi Avropa və Mərkəzi Asiya regionunda fövqəladə hallarda cinsi və reproduktiv sağlamlığın və zərərçəkənlərin hüquqlarının qorunması ilə bağlı ölkələrdə olan irəliləyişlərin qiymətləndirilməsi olub.

Bu məsələnin müzakirəsi üçün Kiyevə texnogen və təbii fəlakətlər zamanı zərərçəkmiş əhalinin reproduktiv sağlamlığının qorunmasında üzv-ölkələr səviyyəsində fəaliyyət göstərən qurum nümayəndələri, BMT-nin aidiyyatı qurumları, beynəlxalq QHT-lər, bu sahədə layihələri maliyyələşdirən donor-təşkilatlarının nümayəndələri toplaşmışdılar.

Ölkəmizdə böhran hallarında cinsi və reproduktiv sağlamlığın qorunub saxlanılması ilə bağlı olan vəziyyət haqda, görülmüş işlər və əldə olunmuş nailiyyətlər barədə forum iştirakçılarını Azərbaycan nümayəndə heyəti - Səhiyyə Nazirliyi İctimai Səhiyyə və İslahatlar Mərkəzinin (İSİM) Lahiyələrin Əlaqələndirilməsi şöbəsinin rəhbəri və Tibbi Keyfiyyət Standartları şöbəsinin həkim-metodisti məlumatlandırıblar.

İki gün davam edən tədbirdə iştirakçılar arasında müzakirələr zamanı böhran hallarında cinsi və reproduktiv sağlamlığın qorunub saxlanılması istiqamətində ölkələrin hazırlıq səviyyələri və ən qabaqcıl təcrübələri öyrənilib.

2016-cı ildə mövzu ilə bağlı üzv-dövlətlərdən alınan materiallar əsasında idarə komitəsinin rolu və strukturu təyinat edilib. Daha sonra yeni idarə komitəsinin tərtib edilməsi haqda müzakirələr də aparılıb. Tədbir zamanı ölkələr arasında geniş miqyaslı əməkdaşlığın yaradılmasının vacibliyi, birgə əməkdaşlığın zəruriliyi forum iştirakçılarına xüsusi olaraq çatdırılıb.

Forumun sonunda təşkilatçılar və iştirakçılar böhran hallarında cinsi və reproduktiv sağlamlığın qorunub saxlanılması istiqamətində ölkə qruplarının potensialını artırmaq, regional və milli səviyyədə fəaliyyəti təkmilləşdirmək qərarına gəliblər və 2017-ci il üçün yeni iş planı hazırlamaq barədə razılıq əldə ediblər.

Səhiyyə Nazirliyi Mətbuat Xidmətinin məlumatı