Azərbaycan Respublikası Səhiyyə Nazirliyinin rəsmi saytı

Məktəblilərə əl yuma qaydaları öyrədildi

Səhiyyə Nazirliyinin İctimai Səhiyyə və İslahatlar Mərkəzi (İSİM) Azərbaycan Respublikasının Prezidenti yanında Bilik Fondu ilə birgə 16 oktyabr 2017-ci ildə Bakı şəhəri Yasamal rayonu 53 nömrəli tam orta məktəbdə şagirdlər üçün 15 oktyabr – Ümumdünya Əl Yuma Gününə həsr olunmuş mühazirə təşkil edib.

 

Bilik Fondunun Beynəlxalq layihələr sektorunun məsləhətçisi çıxış edərək, Fondun İSİM ilə birgə həyata keçirdiyi maarifləndirici, sağlam həyat tərzinin təbliğinə həsr olunmuş layihələrdən söz açıb, beşinci və altıncı sinif şagirdləri qarşısında “Əl yumanın həyati əhəmiyyəti. Sanitariya və gigiyena qaydalarına riayət olunmadığına görə dünyada baş verən xəstəlik halları” mövzusunda təqdimatla çıxış edib.

Çirkli əllər vasitəsilə yayılan yoluxucu xəstəliklər barədə şagirdlərə ətraflı məlumat verildi və bildirildi ki, təhlükəli viruslardan, mikroblardan qorunmaq üçün əlləri vaxtaşırı yumaq (və ya nəm salfetlə silmək) lazımdır. Yeməkdən əvvəl əllərin təmiz yuyulmasının zəruri olduğu iştirakçıların diqqətinə çatdırıldı, əlləri sabunla yumaqla ağır infeksion xəstəliklərin qarşısını almağın mümkünlüyü vurğulandı.

 

Mühazirədən sonra iştirakçılara İSİM tərəfindən hazırlanan və düzgün əl yuma qaydalarını özündə əks etdirən bukletlər paylanılıb.

 

Səhiyyə Nazirliyi Mətbuat Xidmətinin məlumatı

18/10/2017

Azərbaycan Respublikası Səhiyyə Nazirliyin Rəsmi Saytı
Saytdakı materiallardan istifadə edərkən istinad etmək zəruridir!
Bütün hüquqlar qorunur! © 2011-2013..