Azərbaycan Respublikası Səhiyyə Nazirliyinin rəsmi saytı

76 yaşlı qadında qida borusu törəməsi xaric edilib

Respublika Müalicəvi Diaqnostika Mərkəzinə (RMDM) müraciət edən 76 yaşında və ürəyində stent olan pasiyent üzərində ümumi cərrah İlqar İsmayılov tərəfindən qida borusu törəməsi səbəbi ilə Laparoskopik Ezofagektomiya əməliyyatı icra olunub. Kardioloji xəstəliyinə və ahıl yaşda olmasına görə pasiyentə digər mərkəzlərdə əməliyyatın mümkünsüz olduğu deyilsə də, Respublika Müalicəvi Diaqnostika Mərkəzində müasir cərrahi yanaşma ilə həyata keçirilən minimal invaziv əməliyyat nəticəsində pasiyent ağır xəstəlikdən azad edilib və 7 gün sonra normal qidalanması bərpa edilərək evə yola salınıb.

 

 

Qida borusu törəmələrinin müalicəsində cərrahiyyə əsas yer tutur və bu əməliyyatlar texniki çətinlik və risk baxımından ən mürəkkəb hesab edilir. Bu səbəbdən yaşlı və yanaşı xəstəliyi olan pasiyentlərdə çox riskli olduğundan, ənənəvi olaraq, cərrahi müalicə uyğunsuz qəbul edilirdi və əfsuslar olsun ki, bu qrup xəstələr sağalma şanslarını itirmiş olurdular. Lakin son illərdə dünyanın qabaqcıl mərkəzlərində tətbiq olunan Laparoskopik Ezofagektomiya əməliyyatı minimal travmatik olduğundan, əməliyyatsonrası ölüm və ağırlaşma riskini önəmli dərəcədə azaltmış olur.

 

 

Respublika Müalicəvi Diaqnostika Mərkəzində də Laparoskopik cərrahiyyədə ən mürəkkəb hesab olunan Minimal İnvaziv Ezofagektomiya bir neçə ildir icra olunur və 60-dan çox uğurlu əməliyyat həyata keçirilib.

 

 

Dünyada mövcud olan tibbi yeniliklər və texnologiyaların ölkəmizdə tətbiq olunması bir sıra ağır xəstəliklərin müalicəsində imkanlarımızı artırmaqla yanaşı, xəstələrin həyat keyfiyyətini də yüksəltməyə yardım edir.

 

Səhiyyə Nazirliyi Mətbuat Xidmətinin məlumatı

24/06/2019

Azərbaycan Respublikası Səhiyyə Nazirliyin Rəsmi Saytı
Saytdakı materiallardan istifadə edərkən istinad etmək zəruridir!
Bütün hüquqlar qorunur! © 2011-2018..

-->