Azərbaycan Respublikası Səhiyyə Nazirliyinin rəsmi saytı

ÜST Azərbaycana COVID-19-la mübarizə üçün əsas tövsiyələrini açıqladı: testlərin, təmasın izlənməsinin və məlumatların idarə edilməsinin təkmilləşdirilməsi

ÜST-ün 10 günlük missiyası Azərbaycanda COVID-19-a qarşı mübarizə tədbirlərini dəstəkləmək üçün məlumatların toplanması və təhlilinin təkmilləşdirilməsini, təmasın izlənməsinin və test strategiyasının gücləndirilməsini tövsiyə edir.

 

"Bu həftə ÜST-ün COVID-19-u ictimai səhiyyə sahəsində beynəlxalq əhəmiyyətli fövqəladə vəziyyət elan etməsindən altı ay keçir. Bu missiyanın hazırkı zaman çərçivəsində planlaşdırılması Azərbaycanda epidemioloji, kliniki və kommunikasiya nöqteyi-nəzərdən pandemiyaya qarşı mübarizə tədbirlərinə dair aparılan işlərə baxış keçirməyə və gələcək aylarda bu əldə etdiyimiz biliklərdən necə istifadə edəcəyimizi görməyə imkan verdi”, ÜST-ün Azərbaycandakı nümayəndəsi və Ölkə Ofisinin rəhbəri Dr. Hande Harmanci qeyd edib.

 

Ümumdünya Səhiyyə Təşkilatının mütəxəssisləri, COVID-19-a qarşı mübarizə tədbirləri çərçivəsində qoyulan böyük maliyyə və insan resursları sərmayələrini, epidemioloji nəzarət və ictimai ünsiyyət üçün rəqəmsal vasitələrdən geniş istifadə edilməsini və COVID-19-lu xəstələrə göstərilən xidmətin yaxşılaşdırılması sahəsində Azərbaycanın uğurlarını yüksək qiymətləndiriblər.

 

"Azərbaycanda COVID-19 pandemiyasına qarşı aparılan mübarizə tədbirlərində ciddi irəliləyişlər müşahidə etdik. ÜST-ün mart ayında ölkəyə səfər etmiş missiyası əlli səkkiz tövsiyə hazırlamış və bunun da təxminən üçdə ikisi tam və ya qismən yerinə yetirilmişdir", missiyanın rəhbəri, ÜST-ün Avropa Ofisində Səhiyyə məlumatları üzrə departamentin müdiri David Novillo Ortiz qeyd edib. "Pandemiya davam etdikcə yeni çətinliklər ortaya çıxır. Epdemioloji nəzarət, test strategiyası və məlumatların hərtərəfli analizinin təkmilləşdirilməsi ictimai səhiyyə tədbirlərinin həyata keçirilməsi də daxil olmaqla, sübut əsaslı qərarlar qəbul etməyə kömək edəcəkdir."

 

Missiya çərçivəsində ÜST-ün Avropa Ofisindən epidemioloji nəzarət, məlumatların idarə edilməsi, səhiyyə müəssisələrinin idarə edilməsi və risk kommunikasiyası sahələri üzrə mütəxəssislər yerli səhiyyə qurumları və mütəxəssislərlə birlikdə dəyişiklikləri qiymətləndirmək və ölkənin mübarizə mexanizmlərinin təkmilləşdirilməsi üçün müvafiq sahələri müəyyənləşdirmək üzərində birgə çalışıblar. Mütəxəssislər müşahidələr aparmaq və məlumat əldə etmək üçün Bakı, həmçinin Şamaxı və Gəncə bölgələrindəki ilkin səhiyyə xidməti mərkəzlərini və xəstəxanaları ziyarət ediblər.

 

Daha yaxşı hazırlıq və mübarizə tədbirləri üçün səhiyyədə tərəfdaşlığının gücləndirilməsi

 

COVID-19-a qarşı mübarizəyə iki missiya vasitəsilə texniki yardım göstərməklə yanaşı, ÜST-ün Avropadakı və Azərbaycandakı Nümayəndəliyi tibb işçiləri arasında təcrübə mübadiləsini, innovativ həlləri və rəqəmsal platformalardan istifadə təşəbbüsünü, xəstəxanalarda COVID-19-a qarşı mübarizə tədbirlərinin gücləndirilməsini nəzərdə tutan REACT-C19 layihəsini həyata keçirib. ÜST-ün Ölkə Ofisi eyni zamanda, Aİ tərəfindən maliyyələşdirilən "Sağlamlıq üçün Həmrəylik Təşəbbüsü" layihəsini icra edir. Bu layihə çərçivəsində səhiyyə müəssisələrində mübarizənin ön cəbhəsində çalışan şəxslər fərdi qoruyucu vasitələrlə təmin edilir və hökumətə texniki yardım göstərilir.

 

31/07/2020

Azərbaycan Respublikası Səhiyyə Nazirliyin Rəsmi Saytı
Saytdakı materiallardan istifadə edərkən istinad etmək zəruridir!
Bütün hüquqlar qorunur! © 2011-2018..

-->