Biznes mühiti və beynəlxalq reytinqlər üzrə Komissiyanın “Səhiyyə sistemi” işçi qrupunun Səhiyyə Nazirliyi, Əmək və Əhalinin Sosial Müdafiə Nazirliyi, Dövlət Statistika Komitəsi, İcbari Tibbi Sığorta üzrə Dövlət Agentliyi, İqtisadi İslahatların Təhlili və Kommunikasiyası Mərkəzi, İctimai Səhiyyə və İslahatlar Mərkəzi və TƏBİB-in nümayəndələrinin, eləcə də işçi qrupun digər üzvlərinin iştirakı ilə video- konfrans formatında növbəti iclası keçirilib.
Görüş zamanı işçi qrupun əvvəlki iclasında verilən tapşırıqların icra vəziyyəti müzakirə olunub və bu istiqamətdə görülən işlər barədə iştirakçılara ətraflı məlumat verilib.
Eyni zamanda, iclasda Azərbaycan Respublikası Səhiyyə Nazirliyinin “Müharibə veteranları və şəhid ailələrinə psixoloji yardım və tibbi reabilitasiya üzrə 9109 qısa nömrəli Çağrı Mərkəzi”nin fəaliyyəti, habelə regionlarda tibbi xidmətin əlçatanlığının digər illərlə müqayisəsi, dializ mərkəzlərinin fəaliyyəti, İcbari Tibbi Sığorta üzrə Dövlət Agentliyi tərəfindən ambulator xidmətin təşkili üzrə görülən işlər, dərman vasitələrinin təchizatı və bir sıra digər məsələlər geniş şəkildə müzakirə olunub.
İclasın sonunda növbəti görüş üçün işçi qrupun üzvlərinə müvafiq tapşırıqlar verilib.
