Biznes mühiti və beynəlxalq reytinqlər üzrə Komissiyanın Səhiyyə Nazirliyinin rəhbərlik etdiyi “Səhiyyə sistemi” işçi qrupunun dekabrın 11-də növbəti iclası keçirilib.
Tədbirdə Azərbaycan Respublikası Prezidenti Administrasiyası, Səhiyyə Nazirliyi, İcbari Sığorta üzrə Dövlət Agentliyi, İqtisadiyyat Nazirliyi, Əmək və Əhalinin Sosial Müdafiə Nazirliyi, Elm və Təhsil Nazirliyi, Dövlət Statistika Komitəsi, Ailə, Qadın və Uşaq Problemləri üzrə Dövlət Komitəsi, İqtisadi İslahatların Təhlili və Kommunikasiyası Mərkəzi (İİTKM), Azərbaycan Qida Təhlükəsizliyi Agentliyi, Tibbi Ərazi Bölmələrinin İdarəetmə Birliyinin (TƏBİB), həmçinin Səhiyyə Nazirliyi İctimai Səhiyyə və İslahatlar Mərkəzinin və Biznes Mühiti və Beynəlxalq Reytinqlər üzrə Komissiyasının “Səhiyyə sistemi” işçi qrupunun məsul şəxsləri iştirak ediblər.
Səhiyyə nazirin müavini Rasim İsmayılovun sədrliyi ilə keçirilən iclasın gündəliyində işçi qrupun yeni üzvlərinin təqdim olunması, Fəaliyyət Planı üzrə icra edilən işlərin təhlili, əvvəlki görüşün nəticələrinə dair protokolun Qərar hissəsindəki tapşırıqların vəziyyəti barədə müzakirələrin aparılması yer alıb.

Azərbaycan Respublikası Prezidenti Administrasiyasının İqtisadi siyasət və sənaye məsələləri şöbəsinin İqtisadi islahatların monitorinqi, koordinasiyası və qiymətləndirilməsi sektorunun müdiri Vüsal Şıxəliyev iclas zamanı müzakirə edilən tədbirlərin profil strukturlarına müvafiq rəy və təkliflərin verilməsində aparılan işlərin səmərəliliyi baxımından əhəmiyyətini vurğulayıb.
Tədbirdə Səhiyyə Nazirliyinin İctimai səhiyyə və xəstəliklərə nəzarət şöbəsinin müdiri Nəzifə Mürsəlova nazirlik tərəfindən uşaqların immunoprofilaktikası sahəsində görülən işlərə dair məlumatları təqdim edib.

İclasda, həmçinin TƏBİB-in Həssas əhali qrupları ilə iş departamentinin Dövlət proqramları şöbəsinin müdiri Səkinə Qurbanovanın, İİTKM-nin Monitorinq və qiymətləndirmə söbəsinin müdir müavini Səbinə Cumazadənin və digər iştirakçıların çıxışları dinlənilib.
Təqdimatlardan sonra İşçi qrupun üzvləri arasında müzakirələr aparılıb, rəy və təkliflər dinlənib, icra effektivliyinin daha da artırılması istiqamətində tövsiyələr verilib.
İclasın yekunlarına əsasən, 2025-ci ildə “Səhiyyə sistemi” İşçi Qrupunun iclaslarında müzakirə olunacaq məsələlər və növbəti addımlar müəyyənləşdirilib.
Məlumat üçün qeyd edək ki, Biznes mühiti və beynəlxalq reytinqlər üzrə Komissiyanın “Səhiyyə sistemi” işçi qrupununa rəhbərliyi Səhiyyə Nazirliyi həyata keçirir.