Buzovna qəsəbəsində yerləşən Sanator-Kurort Reabilitasiya Mərkəzi, Azərbaycan Respublikasının Prezidenti cənab İlham Əliyevin rəhbərliyi ilə tikilmiş və müasir tələblərə cavab verən ən nümunəvi səhiyyə müəssisələrindən biridir. Bu mərkəz, Səhiyyə Nazirliyi tərəfindən yüksək keyfiyyətli tibbi avadanlıqlarla təchiz olunmuş və geniş praktikaya malik ixtisaslı tibbi heyət ilə təmin edilib.

14 noyabr 2020-ci il tarixində Birinci vitse-prezident Mehriban xanım Əliyevanın təşəbbüsü ilə “Vətən Müharibəsi” qazilərinin istifadəsinə verilən bu unikal mərkəz, torpaqlarımızın bütövlüyü uğrunda qəhrəmanlıq göstərən oğul və qızlarımızın sağlamlığının bərpasına və rifahına xidmət edir. Burada həmçinin şəhid valideynləri və övladları (anaları ilə birgə) üçün müalicə və istirahət imkanları yaradılmış, Ukraynada müharibə nəticəsində valideynlərini itirmiş uşaqlara yay istirahəti və bərpa xidmətləri göstərilib.

Mərkəzin infrastrukturu 250 nəfərin eyni vaxtda qəbulu, müalicəsi, tibbi reabilitasiyası və istirahətini təmin etmək üçün qurulmuşdur. Burada çoxprofilli, yüksək səviyyəli reabilitasiya xidmətləri təqdim olunur. Mərkəzə müraciət edən xəstələrə dəqiq və ətraflı müayinə ilə yanaşı, fərdi reabilitasiya müalicə paketləri təklif edilir.

Etaplı müalicə yanaşması, poliklinika və xəstəxana xidmətlərinin ardıcıl şəkildə təşkili xəstələrin həm fiziki, həm də psixoloji bərpasına nail olmaq üçün mükəmməl imkan yaradır. Dispanser müşahidə üsulları daha da təkmilləşdirilərək, əlilliyin erkən aşkarlanması, qarşısının alınması və reabilitasiyası istiqamətində mühüm işlər həyata keçirilir.